दार्चुला : दार्चुलामा जुवा खेलिरहेका ५ जना नगदसहित पक्राउ परेका छन् । जिल्लाको महाकाली नगरपालिका-४ बसपार्कस्थितको बिरेन्द्र वन गेष्ट हाउसबाट जुवातास खेलिरहेको अवस्थामा ५ जना पक्राउ परेका हुन् ।
पक्राउ पर्नेमा दार्चुलाको महाकाली नगरपालिका–४ बस्ने ३५ वर्षीय पुरन राज खत्री, महाकाली नगरपालिका–४ कै ३५ वर्षीय प्रेम दत्त जोशी, बैतडीको सुर्नया गाउँपालिका–१ बस्ने ३८ वर्षीय दीपक चन्द, कञ्चनपुरको बेतकोट नगरपालिका–९ का ४० वर्षीय खडक बहादुर मल्ल र डडेल्धुराको पर्शुराम नगरपालिका–९ बस्ने ३८ वर्षीय अंगद बोहरा रहेको जिल्ला प्रहरी कार्यालय दार्चुलाका प्रहरी निरीक्षक छत्र बहादुर रावतले जानकारी दिए ।
मङ्गलबार राती साढे १० बजेतिर कोठामा जुवातास खेलिरहेको अवस्थामा उनीहरुलाई पक्राउ गरिएको प्रहरी निरीक्षक रावतले बताए । उनीहरुको साथबाट १ लाख २२ हजार ४ सय ७० रुपैयाँ नगद र २ गड्डी तास बरामद गरिएको छ । यस सम्बन्धमा प्रहरीले आवश्यक अनुसन्धान गरिरहेको जनाएको छ।
यसैबीच प्रहरीले महाकाली नगरपालिका-४ आर्मीगेट अगाडि रहेको सिदुवा जोहारी, ब्याँस टेडर्स एण्ड सप्लायर्समा चोरी गर्नेलाई मङ्गलवार बिहान पक्राउ गरि नियन्त्रणमा लिएको छ ।
यो खबर तपाईंलाई कस्तो लाग्यो?
