दार्चुला : राज भुषालको निर्णायक गोलमा चर्च ब्वाइज युनाइटेड क्लब पोखरामा जारी आहा–रारा गोल्डकपको सेमिफाइनमा प्रवेश गरेको छ । पोखरा रङ्गशालामा सोमवार भएको तेस्रो क्वार्टरफाइनलमा साविक विजेता आर्मीलाई १–० गोल अन्तरले हराउँदै चर्च ब्वाइजले अन्तिम चारमा स्थान पक्का गरेको हो ।
खेलको अन्तिम मिनेटमा नवीन लामाको कर्नरमा भुषालले हेडर गोल गर्दै टोलीलाई सेमिफाइनलको यात्रा तय गराउनुभयो । आर्मी प्रतियोगिताबाट बाहिरिएसँगै प्रतियोगिताबाट बाहिरिने चौँथो टोली बनेको छ । यसअघि उपाधि विजेता आयोजक सहारा क्लब, सङ््कटा क्लब र एपीएफ फुटबल क्लब प्रतियोगिताबाट बाहिरिसकेका छन् ।
चर्च ब्वाइजले अब फाइनल प्रवेशका लागि नेपाल पुलिस क्लबसँग खेल्नेछ । प्रतियोगिताको अन्तिम क्वार्टरफाइनलमा भोलि मंगलबार थन्डरबोल्ट नर्थ युनाइटेड सिक्कीमले उज्वेकिस्तानको ब्ल्याक बुल्स एफसीविरुद्ध खेल्नेछ ।
यो खबर तपाईंलाई कस्तो लाग्यो?
