दार्चुला : दार्चुलामा महिलाहरुको पाठेघरको मुखको क्यान्सरविरुद्धको एचपिभी खोप अभियान सम्पन्न भएको छ । माघ २२ गते देखि सुरु भएको महिलाहरुमा हुने पाठेघरको मुखको क्यान्सरविरुद्धको खोप अभियान सोमबार सम्पन्न भएको हो । दार्चुलाका ९ वटै स्थानीय तहमा गरि लक्ष्यको ९७ प्रतिशत किशोरीले खोप लगाएको स्वास्थ्य कार्यालय दार्चुलाका प्रमुख बिरेन्द्र भट्टले जानकारी दिए ।
जिल्लाका अन्य स्थानीय तहमा यस अघि नै खोप अभियान सम्पन्न भएको र सोमवार महाकाली नगरपालिकामा पनि अभियान सम्पन्न भएको उनले बताए । जिल्लाभरि ७ हजार २५५ जना किशोरीलाई एचपिभी खोप लगाउने लक्ष्य रहेकोमा ७ हजार ४६ जनालाई खोप लगाइएको जनाइएको छ ।
जिल्लाको अपिहिमाल गाउँपालिकामा २ सय ९५ जना र लेकम गाउँपालिकामा ६ सय किशोरीलाई खोप लगाउने लक्ष्य रहेकोमा सत प्रतिशतलाई खोप लगाइएको छ । यस्तै मार्मा गाउँपालिकामा ९ सय ३० जना किशोरीलाई खोप लगाउने लक्ष्य रहेकोमा ९ सय १६ जना, दुहुँ गाउँपालिकामा ४ सय ६६ जना किशोरीलाई खोप लगाउने लक्ष्य रहेकोमा लक्ष्य भन्दा बढी ४ सय ८३ जनालाई खोप लगाइएको स्वास्थ्य कार्यालयका प्रमुख भट्टले बताए ।
जिल्लाको शैल्यशिखर नगरपालिकामा १ हजार २ सय ५१ जनालाई खोप लगाउने लक्ष्य रहेकोमा १ हजार २ सय २ जनालाई खोप लगाइएको छ । त्यस्तै मालिकार्जुन गाउँपालिकामा ७ सय १६ जनालाई खोप लगाउने लक्ष्य रहेकोमा ६ सय ८६ जना, नौगाड गाउँपालिकामा १ हजार ७२ जनालाई खोप लगाउने लक्ष्य रहेकोमा १ हजार ७ जना र ब्याँस गाउँपालिकामा ४ सय ९२ जनालाई खोप लगाउने लक्ष्य रहेकोमा लक्ष्य भन्दा बढी ५ सय ८ जनालाई एचपिभी खोप लगाइएको स्वास्थ्य कार्यालय दार्चुलाले जनाएको छ । महाकाली नगरपालिकामा १ हजार ४ सय ३३ जनालाई खोप लगाउने लक्ष्य रहेकोमा १ हजार ३ सय ४९ .जनालाई खोप लगाइएको स्वास्थ्य कार्यालय दार्चुलाका प्रमुख विरेन्द्र भट्टले बताए ।
यो खबर तपाईंलाई कस्तो लाग्यो?
