दार्चुला : सुदूरपश्चिम प्रदेश सरकारअन्तर्गतको दार्चुला जिल्ला अस्पतालका समस्या समाधानका लागि ध्यानाकर्षण गराइएको छ । मंगलवार दार्चुला जिल्ला प्रदेशसभा क्षेत्र नम्बर १ बाट निर्वाचित सांसद बिक्रम सिंह धामी, अस्पताल व्यवस्थापन समिति अध्यक्ष दिपक जोशी र मेडिकल सुपरिटेन्डेन्ट सन्जीव श्रेष्ठले प्रदेशका सामाजिक विकास मन्त्री मेघराज खड्का र सचिव चक्रपाणी पाण्डेलाई भेटि अस्पतालको समस्याबारे ध्यानाकर्षण गराएका हुन् ।
जिल्ला अस्पताल दार्चुलाले अस्थायी संरचनामा सेवा दिइरहेको छ । अस्पतालसँग अहिले बिरामीको चाप अनुसारको पर्याप्त बेड, जनशक्ति र स्रोत साधन छैन् ।
जिल्ला अस्पतालको भवन निर्माणमा ढिलाई हुँदा समग्र स्वास्थ्य सेवा प्रवाहमा समस्या भइरहेकाले भवन निर्माणको तीव्रता लागि आवश्यक सहयोग र सहजीकरणका लागि ध्यानाकर्षण गराइएको अस्पताल व्यवस्थापन समिति अध्यक्ष दिपक राज जोशीले जानकारी दिए ।
यस्तै अस्पतालको स्वास्थ्य सेवा विकासका लागि उपकरण लगायतमा सहयोग गर्न आग्रह गरिएको छ । जिल्ला अस्पतालको नयाँ भवन निर्माण भइ नसकेको र अस्थायी भवनबाट सेवा संचालनमा रहेकाले त्यहाँ ठाउँ अभावका कारण बिरामी भर्ना गर्न थप बेड सञ्चालनका लागि आवश्यक स्रोत तथा जनशक्ति व्यवस्थापनका लागि सहयोग माग गरिएको अध्यक्ष जोशीले बताए ।
यस विषयमा सामाजिक विकास मन्त्री मेघराज खड्काले दुर्गम क्षेत्रका अस्पतालमा थप उपकरण र अन्य सेवा विस्तारमा मन्त्रालयले सहयोग गर्ने प्रतिवद्धता जनाएका छन् ।
जिल्ला अस्पताल दार्चुलाले बिरामीको चापका आधारमा अहिले १७/१८ बेडको व्यवस्थापन गरेर सेवा दिइरहेको जनाएको छ । गर्मियाम सुरु भएसँगै बिरामीको चाप पनि बढ्ने हुँदा थप बेड र जनशक्ति अभावबारे मन्त्रालयसँग माग राखिएको अस्पतालका मेसु सन्जीव श्रेष्ठले बताए ।
यो खबर तपाईंलाई कस्तो लाग्यो?
