बैतडी : बैतडीको सिगास गाउँपालिका–८ स्थित श्री लेक लुपुड माध्यमिक विद्यालयमा ‘यदुलक्ष्मी अक्षयकोष’ स्थापना गरिएको छ । सिँगास गाउँपालिका–८ सिराडी घर भई हाल कैलालीको धनगढी उपमहानगरपालिका–३ बोराडाँडी बस्ने अर्जुन देव अवस्थीले आफ्ना स्वर्गीय बाजे, बुवाआमा तथा भाईबुहारीको सम्झनामा विद्यालयमा अक्षय कोष स्थापना गरेका हुन् ।
विद्यालयको ६५ औँ वार्षिकोत्सवका अवसरमा स्वर्गीय बाजे धनिराम अवस्थी, स्वर्गीय बुवा यदुराम अवस्थी, आमा लक्ष्मी देवी अवस्थीका साथै स्वर्गीय भाईबुहारी टिकादत्त अवस्थी र निरन्जना अवस्थीको सम्झनामा ६० हजार ६ सय ६६ रुपैयाँ धनराशि भएको अक्षय कोष स्थापना गरिएको श्री लेक लुपुड माविका पूर्व विद्यार्थीसमेत रहेका बैकुण्ठ अवस्थीले जानकारी दिए ।
अक्षय कोष स्थापना गर्ने अर्जुन देव अवस्थी सोही विद्यालयका सेवा निवृत शिक्षक हुन् । लेखकका रुपमा चिनिएका उनका भजन संग्रह, डोटेली लोक सँस्कृति संग्रह (तपाईका हातमा) प्रकाशित छन् । यस्तै बंशावली (अवस्थी तथा च्वागढ क्षेत्रका अन्य जातजातीको), होली संग्रह र उखान टुक्का प्रकाशोत्मुख कृति रहेका छन् । २००८ साल भदौ २५ गते जन्मनु भएका अर्जुन देवले शिक्षा क्षेत्रमा दिनुभएको योगदानको कदर स्वरुप विभिन्न सम्मान तथा पदक प्राप्त गरेका छन् ।
यस्तै विद्यालयमा अध्ययनरत असहाय, गरिब, जेहन्दार बालबालिकाकाको शैक्षिक उन्ययनका लागि सो विद्यालयले शैक्षिक अक्षय कोष कार्यविधि अनुसार कोष स्थापना गरी व्यक्तिगत तथा सामूहिक रुपमा सहयोगका लागि अपेल गरेको छ । सोही सार्वजनिक अपिल बमोजिम विद्यालयलाई ३ लाख ५८ हजार ८ सय ५५ रुपैयाँ संकलन भएको विद्यालयले जनाएको छ ।
यो खबर तपाईंलाई कस्तो लाग्यो?
