दार्चुला : जिल्लास्तरीय राष्ट्रपति रनिङ शिल्ड प्रतियोगितामा दार्चुलाको महाकाली नगरपालिकाले कब्जा जमाएको छ । महाकाली नगरपालिकाले पछिल्लो तीन वर्ष लगातार उपाधि जित्दै जिल्लास्तरीय राष्ट्रपति रनिङ शिल्ड कब्जा गरेको हो । फागुन (१०–१५) गतेसम्म मार्मा गाउँपालिका–४ तपोवन खेलमैदानमा चलेको १५ औँ जिल्लास्तरीय राष्ट्रपति रनिङ शिल्ड प्रतियोगितामा महाकाली नगरपालिका १३ स्वर्ण ११ रजत र ८ कास्य पदकसहित प्रथम भएको छ ।
यस्तै ११ स्वर्ण ११ रजत र १६ कास्य पदकसहित मार्मा गाउँपालिका प्रतियोगितामा द्धितीय भएको छ । ३८ पदकका साथ मार्मा उपबिजेता बनेको हो । प्रतियोगितामा ६ स्वर्ण ५ रजत र ४ कास्य पदकसहित नौगाड गाउँपालिका तृतीय भयो । यस्तै शैल्यशिखर नगरपालिकाले ४ स्वर्ण ५ रजत र १० कास्य, मालिकार्जुन गाउँपालिकाले ४ स्वर्ण ३ रजत र ५ कास्य, अपिहिमाल गाउँपालिकाले ३ स्वर्ण, १ रजत र १ कास्य पदक प्राप्त गरेको छ ।
यसैगरी लेकम गाउँपालिकाले २ स्वर्ण, ५ रजत र ११ कास्य प्राप्त गर्दा जिल्लाको दुहुँ गाउँपालिकाले १ रजत र २ कास्य तथा ब्याँस गाउँपालिकाले १ कास्य पदक प्राप्त गरेको छ । एथ्लेटिक्सका खेलमा उत्कृष्ठ प्रदर्शन गर्न नसकेको महाकाली नगरपालिकालाई कराते र कबड्डीमा सफलता मिलेको हो ।
करातेतर्फ विभिन्न उमेर र तौल समूहअन्तर्गतका खेलमा महाकाली नगरपालिकाले १० स्वर्ण ५ रजत र ५ कास्य जितेको छ । करातेमा द्धितीय भएको मार्मा गाउँपालिकाले २ स्वर्ण, ४ रजत र ७ कास्य पदक, लेकम गाउँपालिकाले करातेमा २ रजत र ४ कास्य, शैल्यशिखर नगरपालिकाले १ रजत र ७ कास्य तथा मालिकार्जुन गाउँपालिकाले १ कास्य पदक हात पार्यो ।
यस्तै कबड्डी छात्रातर्फ मार्मा गाउँपालिका प्रथम, महाकाली नगरपालिका द्वितीय तथा लेकम गाउँपालिका र दुहुँ गाउँपालिका तृतीय भएका छन् । कबड्डी छात्रतर्फ महाकाली नगरपालिका प्रथम, मार्मा गाउँपालिका द्वितीय तथा ब्याँस गाउँपालिका र लेकम गाउँपालिका तृतीय भएका छन् ।
एथलेटिक्सका खेलहरुमा सबैभन्दा बढी मार्मा गाउँपालिकाले ७ स्वर्ण ५ रजत र ८ कास्य पदक जितेको छ । यस्तै नौगाड गाउँपालिकाले ५ स्वर्ण ५ रजत ४ कास्य, मालिकार्जुन गाउँपालिकाले ४ स्वर्ण ३ रजत र ३ कास्य, शैल्यशिखर नगरपालिकाले ३ स्वर्ण ४ रजत ३ कास्य, अपिहिमाल गाउँपालिकाले ३ स्वर्ण १ रजत र १ कास्य, महाकाली नगरपालिकाले २ स्वर्ण ४ रजत २ कास्य, लेकम गाउँपालिकाले २ स्वर्ण ३ रजत र ६ कास्य, दुहुँ गाउँपालिकाले १ रजत पदक जितेको छ ।
भलिबल बलतर्फ छात्रहरुमा शैल्यशिखर नगरपालिका प्रथम, लेकम गाउँपालिका द्धितीय तथा मार्मा गाउँपालिका र दुहुँ गाउँपालिका तृतीय भएका छन् । भलिबलकै छात्रातर्फ नौगाड गाउँपालिका प्रथम, मार्मा गाउँपालिका द्वितीय तथा महाकाली नगरपालिका र मालिकार्जुन गाउँपालिका तृतीय भए । यसअघि १३औँ र १४औँ जिल्लास्तरीय राष्ट्रपति रनिङ शिल्ड प्रतियोगितामा महाकाली नगरपालिका प्रथम भएको थियो ।
यो खबर तपाईंलाई कस्तो लाग्यो?
