दार्चुला : एसइई परीक्षाको नतिजा वर्षेनी खस्किदै गइरहेको आरोप सामुदायिक विद्यालयले खेपिरहेका बेला दार्चुलाको दुहुँ गाउँपालिकाका दुई विद्यालयले विद्यार्थीलाई २४ सै घण्टा विद्यालयमा राखेर पठनपाठन गरिरहेको छ । माध्यमिक शिक्षा परीक्षा (एसइई) को तयारीस्वरुप विद्यालयहरुले आवासीय सुविधासहित विद्यालयमै राखेर पठनपाठन गरिरहेका हुन् ।
दुहुँ गाउँपालिका वडा नम्बर ४ स्थित धारीपाटा मावि धारी र वडा नम्बर ३ को गणेश मावि सिमलीले २४ सै घण्टा विद्यार्थीलाई पठनपाठनको व्यवस्था मिलाएको हो । २४ घण्टा शिक्षकको निगरानी र पढाईको वातावरणमा विद्यार्थी हुन्छन् ।
एसइई परीक्षाको नतिजा सुधार गर्न तयारी कक्षाहरु २४ सै घण्टा सञ्चालन गरिएको दुहुँ गाउँपालिका शिक्षा, युवा तथा खेलकुद शाखा प्रमुख लोकेन्द्र बहादुर बमले जानकारी दिए । धारीपाटा मावि धारीले फागुन ५ गतेदेखि र गणेश मावि सिमलीले फागुन ६ गतेदेखि विद्यालयमै विद्यार्थी राखेर तयारी गरिरहेको उनले बताए ।
विद्यार्थी ६ घण्टा मात्रै विद्यालयमा हुने र बाँकी समय घरमा हुँदा पढाईमा सुधार नभएपछि पूरा समय (२४ घण्टा) विद्यालयमै राखेर तयारी कक्षा सञ्चालन गरिएको धारीपाटी मावि धारीका प्रधानाध्यापक दल बहादुर कुवँरले बताए ।
अधिकांश अभिभावकले आफ्ना छोराछोरीलाई घरमा किताव पढाउन तथा सोधेका कुराहरु सिकाउन नसक्ने भएकाले विद्यालयमै पठनपाठनको समय तालिका निर्माण गरी तयारी गराउन थालिएको गणेश मावि सिमलीका प्रधानाध्यापक मोहन चन्दले बताए ।
विद्यार्थीलाई चैत ३ गतेसम्म विद्यालयमै राखी नियमित तयारी कक्षा सञ्चालन गरिने बताइएको छ । यी विद्यालयहरुमा अहिले गणित, अंग्रेजी र विज्ञान विषयका तयारी कक्षा भइरहेका छन् ।
विद्यालयमै खाने बस्ने व्यवस्था मिलाइएको छ भने माध्यमिक तहमा शिक्षण गर्ने शिक्षकहरु पालैपालो बस्ने र हरेक दिन एक जना अभिभावकसमेत विद्यार्थीसँगै बस्ने गरी व्यवस्थापन गरिएको छ ।
यो खबर तपाईंलाई कस्तो लाग्यो?
