दार्चुला : बन्दुकको गोलीले भाईको हत्या गरि फरार रहेका बैतडीको दोगडाकेदार गाउँपालिका–८ कालागाउँका ४५ वर्षीय कर्ण बहादुर विष्टलाई दार्चुलाबाट प्रहरीले पक्राउ गरेको छ । दार्चुलाको महाकाली नगरपालिका–९ दत्तुबाट विष्टलाई शुक्रवार दिउँसो पक्राउ गरिएको हो ।
जिल्ला प्रहरी कार्यालय दार्चुलाका प्रहरी नायव उपरीक्षक प्रकाश दाहालको नेतृत्वमा खटिएको प्रहरी टोलिले भारत संग सीमा जोडिएको दत्तुबाट फरार विष्टलाई पक्राउ गरेको जिल्ला प्रहरी कार्यालय दार्चुलाका प्रहरी निरीक्षक छत्र रावतले जानकारी दिए ।
गत शनिवार भाई नाता पर्ने २५ वर्षीय सुरेन्द्र विष्टको गोली प्रहार गरी हत्या लगत्तै उनी फरार थिए । विष्ट दत्तु नाका हुँदै भारत भाग्ने योजनामा गाउँमा लुकेको अवस्थामा पक्राउ परेका हुन् ।
मोबाइलको लोकेशनको आधारमा पक्राउ गर्न सफल भएको प्रहरी निरीक्षक रावतले बताए । उनलाई पक्राउ गर्न बैतडीबाट समेत प्रहरी दार्चुला पुगेका थिए । पक्राउ परेका विष्टलाई बैतडी लगिएको छ ।
यो खबर तपाईंलाई कस्तो लाग्यो?
