दार्चुला : दार्चुलाको मालिकार्जुन गाउँपालिकाले परीक्षा सकिएको एक दिनमै नतिजा सार्वजनिक गरेको छ । पालिकास्तरीय आधारभूत तह कक्षा ८ को परीक्षा सकिएको एक दिनमै नतिजा सार्वजनिक गरिएको हो । फागुन २५ गतेबाट सञ्चालन भई चैत ४ गते सम्पन्न भएको पालिकास्तरीय आधारभूत तह कक्षा ८ को परीक्षाफल प्रकाशन गरिएको मालिकार्जुन गाउँपालिकाका शिक्षा, युवा तथा खेलकुद शाखा प्रमुख लोकन्द्र सिंह धामीले जानकारी दिए ।
मालिकार्जुन गाउँपालिकामा १४ वटा विद्यालयका ३ सय २८ जना विद्यार्थीले आधारभूत तह कक्षा ८ को परीक्षामा सहभागिता जनाएका थिए । कूल ३ सय २८ परीक्षार्थीमध्ये १ सय ६७ जना उत्तीर्ण भएका छन् । जुन उत्तीर्ण प्रतिशत ५० दशमलव ९१ हुन आउँछ । यस्तै परीक्षामा १ सय ६१ जना अनुत्तीर्ण भएका छन् । अनुत्तीर्ण प्रतिशत ४९ दशमलव ०८ छ ।
यस्तै मालिकार्जुन गाउँपालिकाको श्री सरस्वती मावि उकुँले आधारभूत तह कक्षा ८ को परीक्षामा शून्य नतिजा ल्याएको छ । २५ जना विद्यार्थीले परीक्षामा सहभागिता जनाएकोमा कुनै पनि विद्यार्थीले ग्रेड प्राप्त गर्न नसकेको गाउँपालिकाले सार्वजनिक गरेको नतिजा विश्लेषण विवरणमा जनाइएको छ । यस्तै गाउँपालिकाका श्री बाँलिचन आवि चडेखान र श्री कृष्ण मावि डाँडाकोटले सत प्रतिशत (ग्रेडेड) नतिजा ल्याएको छ ।
बढीमा २ विषयमा अनुत्तीर्ण (एनजी) भएका विद्यार्थीहरुले ग्रेडवृद्धि परीक्षामा सहभागी हुन पाउनेछन् । ग्रेडवृद्धि परीक्षा चैत्र २० र २१ गते सञ्चालन हुने शिक्षा, युवा तथा खेलकुद शाखा प्रमुख लोकेन्द्र सिंह धामीले बताए । नतिजा पुनर्योग गर्न चाहने विद्यार्थीले चैत्र ८ गतेसम्म विद्यालय समयभित्र विद्यालयको सिफारिसहित गाउँपालिकाको शिक्षा शाखामा सम्पर्क गर्न आग्रह गरेको छ ।
यो खबर तपाईंलाई कस्तो लाग्यो?
