दार्चुला : नेकपा एमालेका पोलिट व्युरो सदस्य एवं पूर्वमन्त्री गणेश सिंह ठगुन्नाले व्यवस्थामाथि प्रश्न उठ्ने काम एमालेको कारणले नभएको बताएका छन् । सोमवार दार्चुला सदरमुकाममा गणतन्तको रक्षा, विकास र अराजक गलत प्रवृतिको विरुद्धमा नेकपा एमालेले आयोजना गरेको जागरण सभालाई सम्बोधन गर्दै ठगुन्नाले एमाले बाहेकका पार्टीहरु देश र जनताप्रति जिम्मेवार नहुँदा व्यवस्थामाथि प्रश्न उठ्ने काम भइरहेको बताएका हुन् ।
लोकतन्त्र पछाडि एमाले बाहेक अरु पार्टीले दार्चुलामा केहि काम नगरेको ठगुन्नाको भनाई छ । एमालेले गरेका कामहरु फोटोमा पोष्ट्याउने बाहेक कुनै काम नभएको उनको भनाई थियो ।
उनले भने–‘जनतामा वितृष्णा कम गर्ने हो भने तपाईहरु पनि जनताको पक्षमा काम गरिदिनुस् । जति हामीले गर्यौ, त्यस्तै तपाईहरु पनि गरिदिनुहोस्, त्यसले जनताका कामहरु समाधान हुन्छन् ।’ उनले अगाडी भने– ‘तपाईहरु जनताको पक्षमा काम नगर्नाले एमालेले मात्रै गरेका कामहरुले समग्रतामा सम्भव भइरहेको छैन् ।’
पूर्वमन्त्री ठगुन्नाले एमालेका हरेक कार्यकर्तालाई आफूले गरेका कामहरु जनताबीच भन्नुपर्ने र लोकतन्त्रमाथि प्रश्न उठे एमालेले खण्डन गर्नुपर्ने बताए ।
राष्ट्रियता, स्वाभिमान र विकास निर्माणका काम र सामाजिक सुरक्षा कार्यक्रम बारे एमालेले जनतामाँझ पुर्याउनुपर्ने उनको भनाई थियो ।
राजाशासनको व्यवस्था निरङ्कुस भनेका ठगुन्नाले अन्य गणतन्त्रबादी दलहरुलाई अवसरबादीको संज्ञा दिँदै उन्नत लोकतन्त्र स्थापना एमालेले मात्रै गर्न सक्ने दाबी गरे ।
यो खबर तपाईंलाई कस्तो लाग्यो?
